மாநில வேளாண்மை மேலாண்மை மற்றும் விரிவாக்க பயிற்சி நிலையம் (சமிதி)

மாநில வேளாண்மை மேலாண்மை மற்றும் விரிவாக்க பயிற்சி நிலையம் (சமிதி) 2012 ஆம் ஆண்டு முதல் ஸ்டாமின் வளாகம் குடுமியான்மலையில் துவங்கப்பட்டு செயல்பட்டு வருகின்றது. வேளாண்மை மற்றும் சகோதரத்துறை விரிவாக்க அலுவலர்களுக்காக இந்நிலையத்தின் மூலம் பல்வேறு பயிற்சிகள் வழங்கப்பட்டு வருகிறது.

முக்கிய குறிக்கோள்கள்

• பொது, தனியார் மற்றும் தன்னார்வ நிறுவனங்களை சார்ந்த விரிவாக்க பணியாளர்களுக்கு, விரிவாக்க மேலாண்மை குறித்த திறனை மேம்படுத்துதல்.
• திட்டமிடுதல், எடுத்துரைத்தல், செயலாக்கம், வரன்முறை மற்றும் மதிப்பீடு பணிகளுக்கான ஆலோசனைகள் வழங்குதல்.
• வேளாண்மை விரிவாக்க பணிகள் திறனை மேம்படுத்தும் வகையில் மேலாண்மை வழிமுறைகளை உருவாக்கி செயல்படுத்துதல்.
• இரண்டாம் நிலை விரிவாக்க பணியாளர்களுக்கு தேவையான பயிற்சிகளை ஏற்பாடு செய்தல்.
• மேலாண்மை தொடர்புகள், பங்குபெறும் முறைகள் குறித்த வழிமுறைகளை ஏற்படுத்துதல்.
• வேளாண்மை மற்றும் வேளாண்மை சார்ந்த பணியாளர்களின் பணித்திறனை மேம்படுத்தும் வகையில் மாநிலத்தில் உள்ள வேளாண்மை சார்ந்த நிலையங்களை ஒருங்கிணைத்து வருடாந்திர பணிமனை நடத்துதல்.

மேற்குறிப்பிட்டுள்ள செயல்பாட்டு திட்டங்களின்படி சமிதி மூலம் வேளாண்மை விரிவாக்க மேலாண்மை முதுகலை படிப்பு (Post Graduate Diploma in Agricultural Extension Management)> இடுபொருள் விற்பனையாளர்களுக்கான வேளாண் விரிவாக்க சேவை பட்டயப்படிப்பு (Diploma in Agricultural Extension Services for Input Dealers), பூச்சிக்கொல்லி மருந்து வியாபாரிகள் மற்றும் விநியோகஸ்தர்களுக்கான பூச்சிக்கொல்லி மேலாண்மை குறித்த சான்றிதழ் படிப்பு, கிராமப்புற இளைஞர்களுக்கான திறன் வளர்க்கும் பயிற்சி (Skill Training of Rural Youth) மற்றும் பண்ணை ஆலோசகர் (Farm Advisor) போன்ற திட்டங்களை ஒருங்கிணைத்து, கண்காணிப்பு செய்து செயல்படுத்தப்படுகின்றன. மேலும் வேளாண்மை திட்டங்கள் தயாரித்தல், செயல்படுத்துதல், கண்காணிப்பு செய்தல் மற்றும் மதிப்பீடு செய்வதில் ஆலோசனைகள் சமிதி மூலம் வழங்கப்படுகின்றது.